"ACCADEMIA DE SA LINGUA SARDA CAMPIDANESA - ONLUS"

Cod. Fisc. 92163320929 - C.C. postali n° 96534318 - ABI: 07601 - CAB: 048000  

PRESIDENTI ONORARIU

Prof. Giuanni Lilliu

Accademicu de is Linceus

 PRESENTÀDA

“ACCADEMIA DE SA LINGUA SARDA CAMPIDANESA-ONLUS”- Cod. Fisc. 92163320929

Cun sedi legali in Bia Grecia n° 9 – 09045- Quartu S. Alèni. Adóbius apprésu sa Biblioteca Comunali de sa Lingua Sarda-Quartu S. Alèni, Bia Brigata Sassari 6- ex cunventu Capuccinus a su costau de sa cresia de Sant’Agata.

Cunsiderau chi sa Lingua Sarda Campidanesa costumàda, sa “conóta”   tenit:

A) un interessu collettivu culturali relevanti reguardanti parti manna  de sa popolazioni chi fuèddat in sardu in d-unu lógu cumprendenti sa metàdi de sa Sardigna cun casi 2/3 de sa  popolazioni sua;

B) chi custa sienda est  in craru perigulu di estinzioni po sa crescenti italianizzazioni e corrumpiméntu de is terminus conótus de issa dépiu tambèni a su nàsci’ sighìu de liburus de gramatica e sintassi no respettosus de sa lingua conóta (“su conótu”);

C) chi est indispensabili intervèniri de suncunas po “tutelài e avvalorài sa Lingua Campidanesa” segundu is dittàminis UNESCO (dogn’abitanti de su mundu tenit derettu a sa propria LINGUA MAMMA) cun d-unu progéttu chi tengat su  fini de  realizzai  is tareas zitàdas;

D) chi “dogna fuéddu chi morit”  cun sei ‘ndi pinnìgat in s’olvidu scìris e costumanzas a issu ligàdas;

E) chi sa lingua nostra, comenti puru dogna varianti de sa Lingua Sarda, est destinàda a morri’ si no bènit prùs fueddàda in familia intre jajus e nebòdis, intre babbus e fillus e si, estinta sa generazioni de is poetas improvvisadoris de òi (Is cantadoris), no at  essi’ prùs cantàda in is prazzas po is festas patronalis o in is  situs de su radiu e de sa televisioni.

Fattas custas cunsiderazionis, unu gruppu de amantis de su Campidanesu, formàu de cultoris,  poetas e scrittoris, autoris de medas pubblicazionis in  custa Lingua i espertus in materia, ant fundàu s’ “ACCADEMIA DE SA LINGUA SARDA CAMPIDANESA – ONLUS”- (foras de finis de interéssu) chi tenit scéti su scopu culturali collettivu de fai conòsci’   a gratis  sa lingua (castia comma 5 - art.10 de su Statùtu) e a defendi’  custu beni comùnu chi arriscat de mòrri’. Po cunsighìri is finis innantis zitàus, giài de su 2008 tenit cursus popularis de Lingua Campidanesa po mannus in is calis evitài su disimpàru de torràda, cursus de Campidanesu in is scolas de Quartu S.E. (in aggiùdu torràu cun su Primu Circulu Didatticu chi diciosamenti at póstu a disposizioni unu locali de sa scola de Bia Siena in sa cantonàda de  Bia Firenze, in is dìs de lunis   e de giòbia de is quattru a is ses oras de su merì. In custa scola, finzas a mesi ‘e idas 2009, si sunt  tèntus corsus de  Lingua, de metrica poetica e de poesia improvvisàda Campidanesa po mannus, mentras in sa scola de  Bia Vespucci, una maista socia de s’Accademia at fattu  unu cursu de Lingua Campidanesa e de teatru po duas classis elementaris, cursus chi ant a prosighìri occannu. In is duas scolas Medias “Lao Silesu” àt portàu sa “Vida Noa” de Dante, opera trasladàda de Giuliu Solinas e recitàda in Campidanesu. A gennargiu 2010 a cumenzài de giobia 7, de is quattru a is ses de su merì, ant a reprendi’ is lezionis de Lingua Campidanesa chi ant a sighìri sempiri de giobia in su matessi orariu. Po su 2010 est in progéttu su tenni’ cursus de impàru po insegnantis chi fuèddant in sardu, de cuncordài cun is Circulus Didatticus chi ddus ant a rechedi’. At ghettàu unu bandu po unu Cuncursu litterariu in Campidanesu po mannus e po tótus is iscolas de Campidanu (castia su bandu in sardu e in italianu in is paginas chi sìghint). Chini bòlessit partizipài a is cursus ddu  podit fai  iscriendusì cun su telefonài a su Presidenti Giuliu Solinas (Tel.070.810529-C.3382050829) o a su Segretariu Giuseppi Cappai (Tel. 070.884957). Po frequentài si podit presentài direttamenti in Bia Firenze–cantonàda Bia Siena, in s’orariu prima inditàu. Chini tenessit su prexeri de s’iscrìri a s’Accademia, ddu pòdit fai telefonendu a  is numerus giài zitaus de su Presidenti Giuliu Solinas o de su Segretariu Giuseppi Cappai. Su cóstu de s’iscrizioni est de 10 Eurus a s’annu de si imbiài cun su C.C postali   n° 96534318. Chini  si ’olessit aggiudài cun donazionis po is attividàdis  de s’ACCADEMIA, pòdit utilizzai su C.C. prima zitàu e, comente ONLUS, pòdit detràiri s’offerta in sa denunzia de su  redditu cun sa cali si pòdit donài tambèni su 5 po milli imbiendìddu a: “ACCADEMIA DE SA LINGUA SARDA CAMPIDANESA-ONLUS”- C.F. 92163320929.

Po crarus motivus, si séus presentaus in  sa Lingua chi ‘oléus defendi’ e ‘ndi féus  sa traslazioni  in sa bella Lingua Italiana po chini si bòllit accostai a conòsci’ su  fueddài nostru.  Cun spera chi is amantis e defensoris de is ateras variantis de sa Lingua Sarda, bollànt sighiri in su surcu de nosus tracciàu, po chi nisciùnu fuèddu de sa propria Lingua Mamma morgiat e chi is Istituzionis, in su traballài cun incùru po su Statutu Autonomisticu Sardu Nóu, ‘nci pòngant is derettus proclamàus de s’UNESCO poi is diversus modus de  fueddài de is sardus, tengu su prexeri, a nòmini de is Sócius, de si saludài a tótus cun is augurius costumaus in Campidanésu po s’Annu Nóu: chi  pozzàis bìvi su 2010 cun is méllus “Oras Bonas” .

                                                                                                                                                     Su Presidenti

                              Giuliu Solinas

PRESIDENTI

Prof. Giuliu Solinas

VICE PRESIDENTIS

Dott. Carlu Pillai

Ins. Greca Secci

SEGRETARIU

Prof. Carmelu Atzeni

VICE SEGRETARIU

Ins. Giuanni Casciu

TESORIERI

Dott. Antoni Contu

CUNSILLERIS

Mons. G. Cadeddu

Prof. Gianpaulu Meloni

Fiero Magno Pes

Antoni Pani

Dott. Luciu Spiga

(portaboxi)

REV. CONTUS

Pres.Valentinu Murgia

Ins. Silvana Biancu

REV. SUPPL.

Prof. Augustu Piscedda

Dott. Pedru Canargiu

© COPYRIGHT 2010 ALL RIGHTS RESERVED WWW.ACCADEMIALINGUACAMPIDANESA.IT